🔴 𝑶 𝑻𝑹𝑰𝑩𝑼𝑵𝑨𝑳 𝑺𝑼𝑷𝑹𝑬𝑴𝑶 𝑨𝑩𝑺𝑶𝑳𝑽𝑬 𝑨 𝑹𝑨𝑭𝑨𝑬𝑳 𝑳𝑶𝑼𝒁Á𝑵 𝑫𝑨 𝑪𝑶𝑵𝑫𝑬𝑵𝑨 𝑫𝑬 𝑺𝑬𝑻𝑬 𝑨𝑵𝑶𝑺 𝑫𝑬 𝑰𝑵𝑯𝑨𝑩𝑰𝑳𝑰𝑻𝑨𝑪𝑰Ó𝑵 𝑬 𝑷𝑬𝑹𝑴𝑰𝑻𝑬 𝑸𝑼𝑬 𝑺𝑰𝑮𝑨 Á 𝑭𝑹𝑶𝑵𝑻𝑬 𝑫𝑨 𝑹𝑭𝑬𝑭

O Tribunal Supremo vén de absolver ao presidente da Real Federación Española de Fútbol (RFEF), Rafael Louzán, quen fora condenado a sete anos de inhabilitación para cargo público por un delito de prevaricación cometido durante o seu mandato como presidente da Deputación de Pontevedra. A causa investigaba a concesión dunha subvención de 86.311 euros para financiar obras de mellora no campo de fútbol de Moraña (Pontevedra). A Fiscalía opúxose á absolución.

Louzán, que tamén foi presidente da Federación Galega de Fútbol, asumiu a presidencia da RFEF o pasado mes de decembro, tras a inhabilitación de Pedro Rocha, quen substituíra a Luis Rubiales. A súa situación na RFEF xerara dúbidas sobre se a condena por prevaricación, de ser declarada firme, lle impediría continuar no cargo.

Porén, a recente sentenza do Tribunal Supremo despexa o camiño para que Louzán siga á fronte da federación. O alto tribunal considera que, malia que a tramitación do concurso para a subvención foi “claramente irregular”, non pode cualificarse como delito de prevaricación. Segundo os maxistrados, este delito require que a resolución adoptada sexa “materialmente inxusta”, condición que non se cumpre neste caso. A sentenza non descarta, en todo caso, unha posible responsabilidade administrativa ou contable polos feitos investigados.

A decisión permite a Louzán manterse como presidente da RFEF, tras promover recentemente unha modificación dos estatutos para consolidar o seu mandato.