O Partido Popular de Cambados lamenta o novo atraso na aprobación do Plan Especial de Ordenación Portuaria, un proxecto que considera fundamental para a reforma da Praza de Abastos. A voceira municipal do PP, Sabela Fole, asegura que o goberno cuatripartito está a dilatar o proceso debido á súa “incapacidade” para sacalo adiante e augura que a remodelación nunca se executará co socialista Samuel Lago á fronte do Concello.
Fole critica que o executivo local retirase este punto da orde do día do pleno, malia que xa foi desbloqueado polas administracións implicadas. “É incomprensible que sigan poñendo escusas, cando levan unha década sen ser quen de sacar a obra adiante”, sinala a concelleira popular. Ademais, rexeita a posibilidade de reducir o alcance da reforma, como suxeriu o alcalde, xa que considera que a Praza de Abastos precisa dunha intervención “ambiciosa e emblemática”.
Para o PP, a verdadeira razón do atraso é a falta de financiamento, xa que o proxecto require 3,5 millóns de euros. Segundo Fole, o goberno local é incapaz de xestionar os fondos necesarios e tampouco aproveita os programas de axudas da Deputación de Pontevedra. “Levan anos dando escusas para gañar tempo e evitar que o malestar veciñal siga crecendo”, concluíu a voceira popular.
O ALCALDE ACUSA A FOLE DE “DESFACHATEZ” POLAS SÚAS CRÍTICAS
Pola súa banda, o alcalde de Cambados, Samuel Lago, respondeu con contundencia ás críticas do PP, cualificándoas de “desfachatez”. Lago lembra que a tramitación deste plan levaba máis de 10 anos bloqueada en Portos de Galicia, polo que non entende que agora os populares critiquen un pequeno atraso de dous meses. “O PP ve a palla no ollo alleo e non a viga no propio”, declarou.
Sobre a reforma da Praza de Abastos, Lago asegura que o Goberno do Estado mantivo unha partida orzamentaria para o proxecto e comprometeuse a estudar o seu alcance. Pola contra, critica a actitude da Xunta de Galicia, que segundo el “nin sequera nos recibe por puro sectarismo político”.
O alcalde tamén avanza que o proxecto existente non satisfai as necesidades reais do sector, polo que será reformulado. “Conseguiremos financiamento con ou sen o apoio da Xunta”, afirmou.
