O goberno local de Vilagarcía levará ao vindeiro pleno dúas propostas relevantes vinculadas á memoria colectiva e aos valores democráticos.
A primeira delas, e en acordo co comité de empresa de DS Smith Packaging Galicia (antiga Lantero), propón a instalación dun monolito e unha placa conmemorativa en homenaxe aos traballadores que participaron no conflito laboral dos anos 2014 e 2015. O emprazamento e o texto da placa decidiranse de forma consensuada entre o comité e o Concello.
Con este recoñecemento, o executivo municipal quere visibilizar a loita e a dignidade dun grupo de traballadores que marcaron unha etapa clave na historia recente de Vilagarcía, reforzando así o compromiso cos dereitos laborais e a xustiza social.
A segunda proposta que se presentará no pleno é unha adenda á revisión do rueiro municipal, na que se deixa claramente especificado que a retirada dunha rúa a unha figura vinculada coa ditadura implica tamén a eliminación de todas as distincións e honores concedidos polo Concello.
Esta modificación vén reforzar a aplicación do artigo 40 da Lei 20/2022, de Memoria Democrática, que obriga a suprimir calquera recoñecemento público a persoas cuxas accións sexan incompatibles cos valores democráticos ou que supoñan exaltación da sublevación militar ou da represión franquista.
O Concello detectou, ademais, erros na listaxe inicial e a ausencia de nomes relevantes como o do xeneral Fernández Ladreda, que foi distinguido coa medalla de ouro da cidade en 1948.
Con estas accións, Vilagarcía dá un novo paso na construción dunha memoria pública baseada nos principios de democracia, igualdade e respecto aos dereitos fundamentais.
