🔴 O PP CRÍTICA O DETERIORO DO VAI BIKE E AFEA A NEGATIVA DO BIPARTITO A MELLORAR O SERVIZO

 O Grupo Municipal do Partido Popular de Vilagarcía cargou duramente contra o goberno local tras o rexeitamento da moción presentada no último pleno, na que solicitaban a mellora urxente do servizo municipal de préstamo de bicicletas Vai Bike. Os populares denuncian o “lamentable estado” das estacións e das bicicletas, que segundo indican, presentan problemas como óxido, falta de iluminación, freos agarrotados ou directamente se atopan fóra de servizo.

A portavoz municipal do PP, Ana Granja, lembrou que o sistema custou 175.450 euros e que, tan só dous anos despois da súa implantación, “as bicicletas están deterioradas e as estacións acordoadas con cintas de perigo”. Segundo o PP, moitas das cláusulas recollidas no contrato de compra non se estarían cumprindo, entre elas a garantía de resistencia ao óxido ou a robustez dos materiais.

Para o grupo da oposición, o mal estado do servizo e os fallos recorrentes na aplicación están provocando unha baixísima utilización por parte da veciñanza. “Segundo os propios datos municipais, apenas dúas persoas usan Vai Bike ao día. Iso evidencia que algo falla”, subliñou Granja. A moción popular incluía propostas como a reparación ou substitución das bicicletas danadas, a recuperación de estacións pechadas e unha revisión técnica e económica do servizo para determinar as causas do seu mal funcionamento.

Porén, PSOE e BNG votaron en contra da iniciativa. O PP lamenta a “falta de autocrítica” do bipartito e cualifica de “sorprendente” a negativa a encargar un informe técnico que permita corrixir deficiencias. “Todo o que poida deixar en evidencia a súa xestión, prefiren ignoralo”, engadiu a portavoz.

Os populares insisten en que a súa proposta “non é ideolóxica, senón de sentido común”, e acusan ao goberno local de antepoñer intereses partidistas á resolución dos problemas reais da cidadanía. “É incomprensible que prefiran manter estacións precintadas antes que poñer en marcha un servizo que debería estar operativo e en bo estado”, concluíu Granja.

Desde o PP piden unha rectificación e apelan á responsabilidade política para recuperar un servizo público que, a xuízo dos populares, “naceu cun custo elevado e está a fracasar por falta de mantemento e vontade de mellora”.