🔴 O PP DA ILLA ACUSA AO BIPARTITO DE APLICAR “CRITERIOS DISCRIMINATORIOS” NAS DEVOLUCIÓNS DAS TAXAS DE LIXO E SANEAMENTO

Os populares reclaman transparencia e igualdade de trato para todos os negocios tras coñecerse que o goberno local aceptou devolver cartos a unha parte dos reclamantes, mentres rexeita as peticións do sector hostaleiro.

O grupo municipal do Partido Popular da Illa de Arousa vén de denunciar o que cualifica como unha actuación “inxusta e discriminatoria” por parte do goberno bipartito formado por PSOE e BNG no referente ás novas taxas de lixo e saneamento aplicadas este ano.

Segundo informa o PP, na última xunta de goberno local extraordinaria, o executivo decidiu aceptar os recursos de reposición presentados por unha quincena de negocios da localidade contra estas taxas, devolvéndolles entre 33 e 440 euros por recibo, cantidades que os populares consideran “cobradas indebidamente”.

Con todo, na mesma sesión, tamén se acordou revisar de oficio e reducir o importe destes tributos no caso dunha pequena empresa. A sorpresa chega, segundo denuncia o PP, ao comprobar que se rexeitaron outros trece recursos similares presentados por locais de hostalería, aos que se lles nega unha rebaixa na liña do que recollen as propias ordenanzas fiscais vixentes para 2024.

“É de xustiza que se rebaixen estas taxas tras o castigo fiscal imposto ás actividades económicas”, aseguran dende o PP, ao tempo que esixen que estas rebaixas se apliquen “en todos os casos, sen facer distincións nin discriminacións”. Os populares reclaman que, igual que se actuou de oficio nalgúns casos, se proceda do mesmo xeito co resto dos negocios afectados.

O voceiro municipal do PP, Matías Cañón, non dubida en cualificar a situación de “grave”: “Ou a brutal suba de impostos non tiña sentido, como dixemos sempre dende o PP, e agora están a recuar, ou son incapaces de xestionar adecuadamente os recibos e acaban cobrándolle de máis á xente. En calquera dos dous casos, estamos ante un problema serio, ben polo seu afán recadatorio ou por neglixencia”.

Ademais, o PP lembra que aínda están pendentes de resolución as reclamacións presentadas polas Vivendas de Uso Turístico (VUT) polas mesmas taxas. Dende o grupo municipal confían en que estas tamén sexan admitidas e se proceda á devolución dos cartos que consideran cobrados en exceso.

Por todo isto, o PP da Illa pedirá explicacións ao goberno local e urxe ao executivo a actuar con transparencia para que os veciños e, especialmente, os empresarios e autónomos do municipio “saiban a que aterse en materia fiscal”.