PANORAMA, OS SATÉLITES E MARBELLA FARÁN A SANTA RITA MÁIS VERBENEIRA DOS ÚLTIMOS ANOS
A concellería de Cultura, dirixida por Sonia Outón, presentou este luns a programación das festas de Santa Rita 2025, que se celebrarán en Vilagarcía do 21 ao 25 de maio. Trátase dunha edición especialmente ambiciosa e musical, coa presenza de tres das mellores orquestras de Galicia: Panorama, Los Satélites e Marbella, ademais do grupo revelación galego The Rapants.
“Podemos presumir da romaría popular máis importante de Galicia, que une tradición con modernidade, música, deporte, cultura… e todo isto en apenas cinco días”, destacou o alcalde Alberto Varela, que compareceu na presentación xunto a Outón.
O programa musical inclúe:
- Mércores 21: Orquestra Panorama (22:30h) no recinto de Fexdega
- Xoves 22: Orquestra Los Satélites (21:30h) na Avenida da Mariña
- Venres 23: Orquestra Marbella (22:30h) tamén na Mariña
- Sábado 24: Concerto de The Rapants (23:00h) no parque da Xunqueira, despois de Ksais (21:30h), e pinchada con Dj Óscar na Alameda
As festas comezan o mércores coa inauguración da Feira Celta ás 18:00h, que estará aberta cada día ata o domingo, de mañá e tarde. Ese mesmo día, o grupo de gaitas Brisas do Río Ulla animará as rúas desde as 20:00h.
O día grande, xoves 22, celebrarase a tradicional procesión de Santa Rita ás 20:00h, con saída dende o convento de Vista Alegre. Nese contexto, o alcalde Alberto Varela fixo unha cariñosa alusión á coincidencia deste ano: por primeira vez temos un Papa da orde Agustina, a mesma á que pertencen as monxas que custodian a Santa Rita de Vilagarcía.
O venres 23, ademais de Marbella, haberá pasarrúas e o concerto do Orfeón de Voces Graves Arousa no Salón García. O sábado estará centrado na música local con Mocedade da Torre 83 e Airiños do Carril, ademais do xa citado cartel musical nocturno.
O domingo 25 será o peche, con pasarrúas, sesión vermú da Banda de Música de Vilagarcía e o Festivaliño On the Road, con curtametraxes infantís na rúa Valentín Viqueira desde as 17:00h.
A nivel deportivo, o sábado acollerá varias probas destacadas:
- Campionato Galego de Pesca Submarina (sábado e domingo)
- III Regata Santa Rita (11:00h)
- IV Torneo Rugby 7 Santa Rita
- Competición de minibalonmán na praza da II República
Toda a programación é gratuíta, e o Concello pide responsabilidade á cidadanía e lembra a dispoñibilidade de 500 prazas de aparcamento gratuíto na Finca Douro.
Vilagarcía prepárase para vivir a Santa Rita máis verbeneira dos últimos tempos, marcando o inicio dun verán cheo de celebracións.
