🔴 PORTAS CONMEMORA OS 150 ANOS DA CHEGADA DO FERROCARRIL A GALICIA CON UNHA EXPOSICIÓN HISTÓRICA

O Concello de Portas presenta este mes unha nova proposta cultural para homenaxear un dos fitos máis importantes da historia galega: a chegada do ferrocarril. A exposición “150 anos da chegada do ferrocarril a Galicia” será inaugurada o xoves 8 de maio ás 19:30 horas na Biblioteca municipal, nun acto no que participarán o alcalde Ricardo Martínez e o comisario da mostra, Carlos Abellán Ruiz.

A mostra, organizada pola Asociación Compostelá de Amigos do Ferrocarril en colaboración coa Asociación Europea de Ferroviarios (AEC-SE), está composta por unha vintena de paneis que percorren a historia do tren en Galicia desde o ano 1873 ata a actualidade. Ademais, inclúe obxectos históricos como farois, libros, teléfonos e mesmo maquetas das estacións orixinais da primeira liña ferroviaria entre Cornes (hoxe Conxo, en Santiago) e Carril (Vilagarcía de Arousa).

A exposición poderá visitarse durante todo o mes de maio na Biblioteca de Portas e pretende achegar ao público o valor histórico, social e cultural que tivo e segue a ter o ferrocarril na nosa terra.