🔴 VILAGARCÍA, CALDAS E ZONA FRANCA FIRMAN UN CONVENIO PARA IMPULSAR A AMPLIACIÓN DO POLÍGONO DO POUSADOIRO

 

O Concello de Vilagarcía deu este venres un paso decisivo para desbloquear a tan esperada ampliación do Polígono Industrial do Pousadoiro. O alcalde Alberto Varela asinou un convenio de colaboración co seu homólogo de Caldas de Reis, Jacobo Pérez, e co delegado da Zona Franca de Vigo, David Regades, co obxectivo de reactivar un proxecto que leva máis de 15 anos paralizado.

Segundo o acordo, será o Consorcio da Zona Franca quen asuma a compra dos terreos e o desenvolvemento integral do proxecto de ampliación, que permitirá duplicar a superficie do actual polígono industrial. Está previsto engadir arredor de 200.000 metros cadrados, a maior parte situados en terreo vilagarcián, pertencentes na súa maioría á comunidade de montes. A adquisición realizaríase mediante compra pública.

“Este plan leva 15 anos metido nun caixón. É absolutamente necesario desatascalo porque temos moitas empresas interesadas en instalarse aquí”, explicou o alcalde de Vilagarcía. Varela destacou tamén o carácter estratéxico da localización, con conexión directa á rede viaria, porto de interese xeral e boas infraestruturas ferroviarias, o que aumenta o atractivo do polígono para novos investimentos.

David Regades sinalou que o primeiro paso é que a Xunta de Galicia autorice unha modificación puntual que permita o cambio de promotor do proxecto, que ata agora estaba en mans de Xestur. “Trátase dun cambio menor, pero imprescindible para poder avanzar”, apuntou o delegado da Zona Franca, quen tamén destacou a importancia de crear novo solo industrial que facilite a chegada de emprendedores e novas empresas.

Ademais da construción do espazo, Zona Franca comprométese a dotar o polígono de servizos e contido, coa creación de centros de negocios e espazos adaptados ao aluguer para pequenas empresas e autónomos.

Tanto Alberto Varela como Jacobo Pérez coincidiron en sinalar que existe un gran interese empresarial na zona e que, ante a falta de implicación por parte da Xunta, os concellos decidiron buscar un socio inversor que lles permita avanzar sen máis demoras. Aínda así, Regades deixou aberta a porta a que o ente autonómico poida participar na financiación do proxecto se así o desexa.

Este convenio marca un punto de inflexión para o desenvolvemento económico da comarca, que poderá contar cun espazo moderno, funcional e adaptado ás necesidades do tecido empresarial actual.