🔴 CASTAÑO ESIXE SOLUCIÓNS URXENTES ANTE A SITUACIÓN CRÍTICA DO CENTRO MÉDICO E AVISA: “ESTÁN A XOUGAR COA VIDA DA XENTE”

 O alcalde de Catoira, Xoán Castaño, mantendrá o vindeiro martes un encontro urxente co xerente da área sanitaria de Pontevedra-O Salnés para abordar a situación crítica do centro médico de Catoira, que, segundo o rexedor, “está nun límite crítico”.

Castaño cualificou de “inadmisible” a situación do consultorio, que se ve afectada pola ausencia continuada das doutoras asignadas, que están de baixa ou con redución de xornada e realizando gardas noutras localidades, sen ser substituídas. Este feito está a deixar a veciñanza sen atención médica adecuada, algo que o alcalde considera intolerable.

“Están a xogar coa vida da xente. O Concello fará toda a forza posible para que se asigne persoal facultativo ao consultorio tanto pola vía institucional e administrativa como apoiando as reivindicacións da Plataforma pola Sanidade Pública na protesta convocada para o vindeiro mércores”, sinalou Castaño.

O rexedor, tamén nacionalista, fixo referencia á falta de planificación das baixas e gardas das dúas médicas asignadas ao centro de saúde, unha situación que, segundo afirmou, “a xerencia xa sabía que ía pasar e deixou que empeorase”. Desde hai dous meses, o consultorio só conta cunha doutora dispoñible, pero tamén con reducción de xornada. A segunda médica atópase de baixa e a súa praza está sen cubrir.

Este feito está a agravar a situación xa que a doutora dispoñible, cando realiza gardas noutras localidades, deixa ao centro médico sen atención ao día seguinte, polo seu descanso correspondente. As substitucións puntuais que se realizaban tamén desapareceron, o que está a xerar unha grave escaseza de persoal.

Outro dos problemas mencionados por Castaño é a limitación do persoal de Enfermería, que non pode realizar derivacións de urxencia ao centro de referencia de San Roque, e as consultas extraordinarias teñen que ser enviadas ao centro do Salnés. Isto provoca importantes problemas de desprazamento para a veciñanza, especialmente para aquelas persoas maiores ou con mobilidade reducida.