A Consellería do Mar reforza o seu compromiso coa formación no sector marítimo-pesqueiro, estratéxico para Galicia, cun investimento de 12,3 millóns de euros destinado á rede autonómica de centros formativos. Esta aposta permite afrontar desafíos clave como a remuda xeracional e a capacitación de novos profesionais nun sector que representa o 5% do PIB galego e dá emprego a arredor de 50.000 persoas.
DOUS CENTROS DE REFERENCIA NACIONAL EN VIGO E A ILLA DE AROUSA
Galicia conta con dous Centros de Referencia Nacional (CRN): o Instituto Politécnico Marítimo-Pesqueiro do Atlántico (Ipmpa) en Vigo, especializado en pesca e navegación, e o Instituto Galego de Formación en Acuicultura (Igafa), na Illa de Arousa, pioneiro en acuicultura e mergullo. Ambos centros sitúanse na vangarda da formación a nivel estatal e europeo.
O Ipmpa é o primeiro centro público de España deste tipo e destaca polo seu equipamento avanzado: obradoiros de motores, simuladores de navegación e comunicación, e un planetario de 8 metros de diámetro, único en España e segundo en Europa. O centro conta ademais cunha residencia con capacidade para 70 estudantes.
Pola súa banda, o Igafa acadou recentemente a homologación internacional do seu ciclo medio en Operacións Subacuáticas e Hiperbáricas pola International Marine Contractors Association (IMCA), sendo o primeiro centro público en España con esta distinción. As súas instalacións inclúen piscina interior, cámara hiperbárica, estación de carga de gases e diversas embarcacións.
MÁIS DE 500 MATRICULADOS E 1.200 ALUMNOS EN FORMACIÓN NON REGRADA
No curso actual, máis de 500 persoas están matriculadas nos ciclos superiores e medios vinculados á formación marítimo-pesqueira, a maior cifra desde 2018. A formación regrada abrangue desde Patrón de Altura e Mecánico Maior Naval ata Acuicultura e Cultivos Acuícolas. Tamén se oferta o ciclo en Operacións Subacuáticas e Hiperbáricas, con inserción laboral do 100%.
A maiores, máis de 1.200 persoas participaron en 102 cursos de formación non regrada durante 2024, entre os que destacan: formación básica en protección marítima, primeiros auxilios, patrón costeiro polivalente ou mariñeiro pescador. Unha parte importante do alumnado son mulleres, representando máis do 37% no Igafa, contribuíndo á igualdade de xénero nun sector tradicionalmente masculinizado.
COLABORACIÓN CO SECTOR PESQUEIRO
A Xunta traballa da man das entidades do sector para ampliar a oferta formativa. Ao longo de 2024, impártense 97 cursos a través de 17 entidades como confrarías (Ribeira, Noia, Burela, O Grove…) e a Cooperativa de Armadores do Porto de Vigo. Estes cursos, financiados ao abeiro dunha orde de axudas bianual con 1,5 millóns de euros, benefician a centos de persoas e contribúen á profesionalización do sector.
INSERCIÓN LABORAL E FORMACIÓN NO EXTERIOR
Este curso, 70 estudantes do Ipmpa realizarán prácticas en buques pesqueiros que operan en caladoiros como Terranova, África ou Gran Sol, mentres outros optan por buques de pasaxe ou remolcadores. Tamén rematan a súa formación alumnado das escolas de Ribeira e Ferrol, sumando ata 220 novos profesionais preparados para incorporarse ao mercado laboral.
Ademais, o Igafa participa en programas europeos como Erasmus+ desde 2010 e colabora coas universidades galegas no Máster en Innovación e Xestión Acuícola, mantendo aberta a porta a novas oportunidades dentro e fóra de Galicia.
