🔴 AREEIRO, REFERENTE INTERNACIONAL NA INVESTIGACIÓN DE CULTIVOS GRAZAS AO IMPULSO DA DEPUTACIÓN

A Estación Fitopatolóxica Areeiro vive un dos seus mellores momentos da historia. Convertida xa nun referente internacional na investigación de cultivos e especies vexetais, está a recibir un impulso sen precedentes por parte do goberno de Luis López na Deputación de Pontevedra, que destinou 9,3 millóns de euros nos dous primeiros anos de mandato a consolidar este centro como símbolo de innovación, vangarda e excelencia científica.

O deputado provincial Javier Tourís subliña que “nunca antes se investira tanto en Areeiro”, cun total de 6,1 millóns de euros dedicados á investigación fitopatolóxica e outros 3,1 millóns para mellorar estruturas e sistemas produtivos. No mesmo período tamén se apoiaron liñas estratéxicas como a viticultura e o kiwi, realizáronse máis de 5.000 análises fitopatolóxicas, 5.300 informes de fertilidade, doáronse 2.000 plantas, producíronse case 200 litros de aceite e 16 quilos de TéAreeiro.

A actividade científica tivo proxección internacional: 9 publicacións en revistas especializadas, 88 secuencias para patentes e 12 ensaios colaborativos, que consolidan a Areeiro como un actor chave no panorama científico agrario europeo.

Esta aposta por Areeiro enmárcase dentro dun investimento global da Deputación de preto de 20 millóns de euros no medio ambiente, o medio rural e a investigación, a través dos servizos de Medio Ambiente e Mar (dirixido por Marcos Guisasola), Mouriscade (coordinado por Jorge Cubela) e Areeiro (con Tourís á fronte).

💬 “Estamos a facer da provincia un exemplo de como combinar tradición agraria con innovación científica e respecto polo medio ambiente”, asegurou Tourís, poñendo en valor o compromiso da Deputación cun modelo sostible, con futuro e con nome propio: Areeiro.