🔴 O BNG PROPÓN O POMBAL COMO ALTERNATIVA REAL PARA OS GRANDES CONCERTOS EN CAMBADOS

O BNG de Cambados, a través do seu portavoz Liso González, vén de propoñer unha alternativa clara e viable para a celebración dos grandes concertos e eventos musicais do verán: o espazo deportivo do Pombal. Trátase do mesmo lugar no que tivo lugar recentemente o Festival Sondomar, cun resultado moi positivo tanto a nivel técnico como de participación cidadá.

Segundo explica a formación nacionalista, o éxito da organización deste festival amosa que o Pombal reúne todas as condicións necesarias para acoller grandes espectáculos: permite un control eficaz do aforo, é un espazo pechado e seguro, non interfire no tráfico nin na vida diaria do centro urbano, facilita a montaxe e desmontaxe do material técnico, e mesmo pode contar co apoio do pavillón municipal para operativas como cameríns ou almacenamento, especialmente en época estival cando hai menos actividade deportiva.

O BNG considera que a Praza de Fefiñáns, pola súa importancia histórica, patrimonial e simbólica, debe quedar reservada para eventos de menor impacto, que garantan a súa conservación e non comprometan nin a estrutura do ben nin a convivencia veciñal. Desde hai anos veñen defendendo que esta praza, un dos principais atractivos de Cambados, non pode seguir asumindo eventos masivos que xeran problemas de masificación, ruído, alteración do tráfico e presión sobre os negocios e residentes da zona.

A alternativa do Pombal permite manter unha programación cultural ambiciosa sen renunciar á protección do patrimonio. Para o BNG, Cambados pode e debe ser un exemplo de convivencia entre cultura e conservación, e considera que esta proposta non é un freo á celebración de concertos, senón unha oportunidade para facelo mellor, de maneira máis organizada e sen consecuencias negativas.

Desde a concellería de Patrimonio valorouse positivamente esta opción e enténdese que agora hai un escenario claro para repensar o modelo de uso do espazo público e dar o paso cara a unha nova etapa.

O BNG fai un chamamento ao diálogo e á responsabilidade colectiva para avanzar neste sentido, co convencemento de que Cambados pode ser un referente en Galicia na xestión intelixente e sustentable dos seus eventos culturais.