🔴 𝗔 𝗖𝗜𝗚-𝗘𝗡𝗦𝗜𝗡𝗢 𝗗𝗘𝗡𝗨𝗡𝗖𝗜𝗔 𝗣𝗥𝗘𝗖𝗔𝗥𝗜𝗘𝗗𝗔𝗗𝗘 𝗡𝗔 𝗘𝗦𝗖𝗢𝗟𝗔 𝗜𝗡𝗙𝗔𝗡𝗧𝗜𝗟 𝗠𝗨𝗡𝗜𝗖𝗜𝗣𝗔𝗟 𝗗𝗘 𝗩𝗜𝗟𝗔𝗚𝗔𝗥𝗖𝗜́𝗔

A CIG-ENSINO denunciou publicamente a situación de precariedade laboral que, segundo o sindicato, está a atravesar o persoal da Escola Infantil Municipal de Vilagarcía. O centro, xestionado dende hai máis de 30 anos pola empresa privada BONECOS VILAGARCÍA S.L., conta con arredor de 20 profesionais entre educadoras, auxiliares e persoal de servizos complementarios.

Segundo explicou a organización sindical, o cadro de persoal non cobrou o salario completo do mes de setembro, percibindo unicamente o 50% da nómina, por causas alleas ao seu traballo. Ademais, xa nos meses anteriores a dirección da empresa trasladara a intención de non aboar determinadas cantidades, o que xerou malestar entre o persoal, que considera que traballar sen cobrar puntualmente non é aceptable.

A CIG-ENSINO engade que a situación se agrava ao comprobar que a maioría do persoal realiza menos horas das establecidas no convenio colectivo, que marca 38-39 horas semanais, cando actualmente hai traballadoras que fan entre 20 e 38 horas.

Outro dos puntos que o sindicato destaca é o desequilibrio salarial derivado do novo convenio colectivo aprobado en xuño de 2025. Este establece unha dobre escala salarial, o que fai que o persoal da Escola Infantil Municipal cobre arredor de 200 euros menos ao mes nas 14 pagas por unha xornada completa, debido a que o Concello non sacou a licitación do servizo nin optou pola súa remunicipalización.

Desde a CIG-ENSINO aseguran que o obxectivo desta denuncia é dar visibilidade á situación e informar tamén ás familias usuarias do centro, buscando transparencia e unha pronta solución ao conflito. “O persoal quere traballar e cobrar puntualmente polo servizo que presta con total normalidade”, subliñan dende o sindicato.

🟢 O Concello de Vilagarcía responde

Pola súa banda, a concelleira de Servizos Sociais, Tania García, confirmou que o Concello é coñecedor da situación “deficitaria” que atravesa a empresa concesionaria e que leva meses financiando extraordinariamente o servizo para garantir o seu funcionamento.

“Sabemos que a empresa está pasando por un momento delicado, pero é a súa responsabilidade facer fronte aos pagos, e así llo trasladaremos para que a situación se resolva canto antes”, indicou García.

A responsable municipal explicou que o Concello mantén reunións constantes coa patronal e cos sindicatos, e está a buscar fórmulas legais e económicas para resolver o problema canto antes. “A nosa prioridade é garantir o servizo ás familias e a estabilidade das traballadoras”, concluíu.