🔴 A ANPA DO CEIP DE RUBIÁNS DENUNCIA UNHA DISCRIMINACIÓN HORARIA E PIDE Á XUNTA UNHA SOLUCIÓN INMEDIATA

🔴 A ANPA A Casanova do CEIP Plurilingüe de Rubiáns dirixiuse oficialmente á Xunta de Galicia para denunciar unha situación que consideran “inxusta e discriminatoria” coa súa comunidade educativa. A presidenta da asociación explica que o centro leva dende o curso 2007-2008 cun horario lectivo de 9:50 a 14:50 horas, sendo o único colexio de Vilagarcía con esa franxa, o que —aseguran— xera graves problemas de conciliación e prexuízos para o alumnado.

Desde a ANPA lembran que o Consello Escolar aprobou un horario de 9:30 a 14:30, igual ao do resto dos centros públicos do municipio, pero a Consellería de Educación négase a autorizar o cambio alegando cuestións vinculadas ao servizo de transporte escolar. “É inadmisible que o horario do noso alumnado estea determinado polos criterios dunha empresa privada e non polas necesidades pedagóxicas e de saúde das crianzas”, sinalan.

A asociación subliña que o actual servizo de transporte é compartido con outros colexios, o que reduce o tempo de comedor a apenas 15 minutos. Segundo os informes médicos que achegaron á administración, os nenos e nenas deberían dispor dun mínimo de 40 minutos efectivos para xantar con tranquilidade. “Estamos a falar dunha cuestión básica de saúde e benestar infantil”, engaden.

Ao longo dos últimos meses, a ANPA de Rubiáns desenvolveu numerosas accións reivindicativas: recolleron máis de 1.200 sinaturas, conseguiron o apoio unánime de todos os grupos políticos no Concello de Vilagarcía, levaron o caso ao Parlamento galego da man do BNG e do PSOE, e contaron co respaldo do resto das ANPAS do municipio e da asociación Zona Aberta. “A pesar de todo isto, seguimos sen obter resposta nin solución”, denuncian.

Desde a asociación critican tamén a falta de diálogo institucional. “Solicitamos reunións co conselleiro de Educación e mesmo co presidente da Xunta, pero nunca fomos recibidos. Reunímonos con Mobilidade, pero limitáronse a dicirnos que non poden garantir nada e que todo dependerá da empresa concesionaria”, lamentan.

A ANPA reclama que a Consellería de Educación asuma a súa responsabilidade e priorice os criterios pedagóxicos e de saúde sobre os intereses dunha empresa privada. “Levamos 17 anos loitando por algo tan sinxelo como ter o mesmo horario que o resto dos centros públicos de Vilagarcía. É hora de poñer fin a esta inxustiza”, conclúen.