🔴 𝗢 𝗣𝗣 𝗗𝗔 𝗜𝗟𝗟𝗔 𝗔𝗖𝗨𝗦𝗔 𝗔 𝗨𝗡𝗛𝗔 𝗠𝗘𝗠𝗕𝗥𝗔 𝗗𝗢 𝗕𝗡𝗚 𝗗𝗘 𝗨𝗦𝗨𝗥𝗣𝗔𝗥 𝗙𝗨𝗡𝗖𝗜Ó𝗡𝗦 𝗠𝗨𝗡𝗜𝗖𝗜𝗣𝗔𝗜𝗦

O grupo municipal do Partido Popular da Illa de Arousa vén de denunciar que Lidia Barreiro, número 5 da candidatura do BNG nas pasadas eleccións municipais e supostamente futura concelleira, estaría actuando irregularmente como representante do goberno local, arrogándose as competencias en Educación e Igualdade a pesar de non ter tomado aínda posesión da súa acta.

Segundo explican os edís populares, Barreiro remitiu un correo electrónico aos membros da corporación municipal convidándoos a participar nas actividades programadas para o 25 de novembro, Día Internacional contra a Violencia sobre as Mulleres, asinando a mensaxe como responsable das áreas de Educación e Igualdade.

Para o PP illeño, esta situación é “totalmente anómala e irregular” e supón “unha usurpación de funcións e un uso indebido da representación oficial e lexítima do Concello da Illa de Arousa”. Lembran que a renuncia da concelleira nacionalista Elena Otero aínda non foi tratada en pleno —previsto para mañá—, polo que Lidia Barreiro non recibiu as credenciais da Xunta Electoral nin tomou posesión da súa acta, algo que quedará pendente para unha próxima sesión.

Os populares tamén se preguntan como Barreiro puido acceder aos enderezos electrónicos dos membros da corporación, xa que, segundo subliñan, “aínda non forma parte dela” e, con todo, “asinou o convite en calidade de concelleira”.

Por todo iso, desde o PP da Illa esixen que Lidia Barreiro rectifique de inmediato e lamentan o que consideran unha nova irregularidade do BNG, ao tempo que acusan ao alcalde Luis Arosa de permitir “que se empregue o Concello como se fose a sede do Bloque”.

Finalmente, os populares instan ao grupo nacionalista a respectar as institucións e os seus tempos e a pedir desculpas públicas polo sucedido.