🔴 𝐎𝐒 𝐓𝐀𝐍𝐐𝐔𝐄𝐒 𝐃𝐄 𝐁𝐄𝐓𝐔𝐌𝐄 𝐃𝐀 𝐂𝐎𝐌𝐁𝐎𝐀 𝐄 𝐎 𝐀𝐑𝐑𝐀𝐍̃𝐗𝐎 𝐃𝐎 𝐏𝐑𝐄𝐆𝐔𝐍𝐓𝐎𝐈𝐑𝐎 𝐀𝐎 𝐏𝐋𝐄𝐍𝐎 𝐃𝐄 𝐕𝐈𝐋𝐀𝐆𝐀𝐑𝐂𝐈́𝐀

 

🔴 O primeiro Pleno do ano, que se celebrará o vindeiro xoves 8 de xaneiro, abordará dous asuntos de plena actualidade e especial relevancia para Vilagarcía, ambos vencellados ao tratamento da zona litoral: a problemática da altura dos depósitos de betume proxectados no Porto, na contorna da área de protección patrimonial da Comboa, e o arranxo da balaustrada e do paseo do Preguntoiro. 

🔴 En ambos casos, as iniciativas chegan da man do grupo municipal socialista, que presenta dúas mocións para o seu debate e posible aprobación pola Corporación. 🏛️📝

🔴 A proposta relativa aos tanques de betume vai en consonancia coa alegación presentada esta mesma semana polo Concello de Vilagarcía ante a Consellería de Economía e Industria. Nela recoñécese que o proxecto promovido por 𝐁𝐄𝐓𝐔𝐍𝐄𝐒 𝐆𝐀𝐋𝐋𝐄𝐆𝐎𝐒, 𝐒𝐋𝐔, que prevé a construción de varios depósitos —un deles de ata 27 metros de altura—, cumpre coa letra da normativa urbanística e do Plan Especial do Porto, pero non co espírito da lei. 

🔴 Os socialistas consideran que o desenvolvemento portuario non pode realizarse en detrimento do patrimonio local, lembrando que o Porto de Vilagarcía se sitúa nun ámbito de alto valor histórico, cultural e paisaxístico, recoñecido por diversas figuras de protección, como a casa dos Duques de Terranova ou a contorna da lagoa da Comboa e as súas mansións. 

🔴 Segundo se expón na moción, os tanques previstos nesta zona portuaria “destacarían pola súa descomunal altura e volume”, polo que a súa execución suporía un impacto visual, paisaxístico e patrimonial moi significativo, alterando de maneira irreversible a percepción do conxunto histórico da Comboa e afectando tanto a bens protexidos como ao dereito da cidadanía a gozar dun entorno equilibrado e respectuoso coa súa contorna cultural. 

🔴 O texto defende que “o desenvolvemento económico do porto debe ser compatible coa defensa do interese xeral, a preservación do patrimonio e a calidade de vida da veciñanza”, polo que se propón que o Concello manifeste formalmente a necesidade de reducir o impacto visual, limitando a altura dos depósitos. Así mesmo, instarase á administración autonómica a rebaixar a altura proxectada dos bidóns a unha dimensión compatible coa protección do patrimonio histórico e cultural, dando traslado do acordo á Autoridade Portuaria, a Portos do Estado e á Xunta de Galicia. 

🔴 Por outra banda, a segunda moción socialista céntrase no paseo e na balaustrada do Preguntoiro, reclamando a Portos de Galicia que acometa o seu arranxo antes do verán ou, en todo caso, antes de que os terreos sexan desafectados e pasen a titularidade municipal. 

🔴 O grupo lembra a controvertida actuación de 2014, durante o mandato de 𝐓𝐎𝐌𝐀́𝐒 𝐅𝐎𝐋𝐄, cando a antiga varanda de aceiro foi substituída por unha balaustrada que, malia reproducir a estética da praia de Compostela, resultou demasiado alta, menos resistente e con menor visibilidade cara ao areal e ao mar. 

🔴 A falta de mantemento ao longo dos anos, tanto da balaustrada como do pavimento do paseo, provocou que esta zona privilexiada do litoral de Vilaxoán se atope nun estado moi deficiente, tanto a nivel estético como de accesibilidade. Os socialistas lembran que se trata dun espazo moi frecuentado no verán, cun tránsito diario de milleiros de persoas. 🚶‍♂️👨‍👩‍👧‍👦

🔴 Ademais, sinalan que esta intervención resulta clave para complementar as actuacións que está a realizar o Concello co obxectivo de recuperar a Bandeira Azul que hai anos ondeaba neste areal.