🔴 𝐕𝐀𝐑𝐄𝐋𝐀 𝐀𝐆𝐑𝐀𝐃𝐄𝐂𝐄 𝐀 𝐀𝐂𝐓𝐈𝐓𝐔𝐃𝐄 𝐃𝐎 𝐁𝐍𝐆 𝐏𝐀𝐑𝐀 𝐆𝐀𝐑𝐀𝐍𝐓𝐈𝐑 𝐀 𝐄𝐒𝐓𝐀𝐁𝐈𝐋𝐈𝐃𝐀𝐃𝐄 𝐃𝐎 𝐆𝐎𝐁𝐄𝐑𝐍𝐎 𝐃𝐄 𝐕𝐈𝐋𝐀𝐆𝐀𝐑𝐂𝐈́𝐀

O goberno local de Vilagarcía, representado polo alcalde 𝐀𝐥𝐛𝐞𝐫𝐭𝐨 𝐕𝐚𝐫𝐞𝐥𝐚, e os edís do grupo nacionalista, 𝐗𝐚𝐯𝐢𝐞𝐫 𝐑𝐨𝐝𝐫𝐢́𝐠𝐮𝐞𝐳 e 𝐑𝐨𝐬𝐚 𝐀𝐛𝐮𝐢́𝐧, mantiveron onte unha nova reunión de seguimento dos acordos entre PSOE e BNG, co obxectivo de reforzar a gobernabilidade municipal e avanzar en proxectos estratéxicos para a cidade.

A xuntanza, desenvolvida nun clima cordial, tivo lugar mentres os servizos técnicos ultiman a elaboración do Orzamento de 2026, que ambas formacións prevén aprobar no primeiro trimestre do ano.

Durante o encontro analizouse o estado da humanización da rúa Vicente Risco, cuxo procedemento de adxudicación está pendente unicamente da ratificación pola Xunta de Goberno. Así mesmo, abordouse a mellora da rúa San Roque, co documento técnico xa rematado e á espera da formalización do préstamo incluído no Orzamento de 2025.

Este crédito, por importe de tres millóns de euros, permitirá financiar esta actuación e outras intervencións, entre elas a adquisición dun solar en Carril para habilitar un novo aparcadoiro disuasorio. O préstamo atópase na súa fase final de licitación, polo que os investimentos poderán executarse en breve prazo.

O alcalde 𝐀𝐥𝐛𝐞𝐫𝐭𝐨 𝐕𝐚𝐫𝐞𝐥𝐚 agradeceu expresamente a actitude do BNG e subliñou que “o diálogo contribúe á estabilidade e iso tradúcese en mellores servizos para a cidadanía, que para iso nos elixiron”. Neste sentido, destacou o modelo de colaboración dos nacionalistas, que —sen formar parte do goberno— contribúen á estabilidade e á mellora de Vilagarcía.