𝐎𝐒 𝐃𝐄𝐏𝐔𝐓𝐀𝐃𝐎𝐒 𝐏𝐎𝐏𝐔𝐋𝐀𝐑𝐄𝐒 𝐃𝐄𝐍𝐔𝐍𝐂𝐈𝐀𝐍 𝐃𝐄𝐈𝐗𝐀𝐂𝐈Ó𝐍 𝐈𝐍𝐒𝐓𝐈𝐓𝐔𝐂𝐈𝐎𝐍𝐀𝐋 𝐀𝐍𝐓𝐄 𝐀 𝐍𝐀𝐑𝐂𝐎𝐂𝐀𝐒𝐀 𝐃𝐄 𝐓𝐑𝐀𝐁𝐀𝐍𝐂𝐀 𝐁𝐀𝐃𝐈Ñ𝐀 𝐄 𝐀𝐂𝐔𝐒𝐀𝐍 𝐀𝐎 𝐂𝐎𝐍𝐂𝐄𝐋𝐋𝐎 𝐃𝐄 𝐀𝐁𝐀𝐍𝐃𝐎𝐍𝐀𝐑 𝐎 𝐁𝐀𝐑𝐑𝐈𝐎

 🔴 Os deputados nacionais Juan Bayón, Pedro Puy e Irene Garrido denunciaron publicamente a “deixación institucional” do Concello de Vilagarcía de Arousa e do Ministerio do Interior ante a situación que, segundo sinalan, se vive arredor da coñecida como narcocasa situada en Trabanca Badiña.

Os parlamentarios populares mantiveron unha reunión con representantes da Asociación de Veciños San Miguel, que lles trasladaron a súa preocupación pola problemática que aseguran estar sufrindo desde hai tres anos. Segundo explicaron, a vivenda converteuse nun punto habitual de menudeo de drogas, con consumo na vía pública e altercados frecuentes.

Os veciños denuncian que persoas drogodependentes utilizan a fonte do parque para asearse e que a contorna presenta unha imaxe crecente de deterioro, xerando unha sensación constante de inseguridade entre as familias e menores que residen na zona.

Os deputados lembraron ademais que no mes de setembro do pasado ano dous homes resultaron feridos moi graves tras unha pelexa con martelos nas inmediacións da vivenda. Ao seu xuízo, este episodio evidencia a gravidade dunha situación que, segundo indican, non foi abordada con determinación polas administracións competentes.

O deputado Juan Bayón foi especialmente crítico co goberno local, ao que acusou de “poñerse de costas ao problema”. Segundo afirmou, os residentes levan anos presentando instancias no Concello sen obter unha solución efectiva. “Estamos a asistir a unha completa deixación de funcións. Hai pelexas constantes, trapicheo de drogas e cans de razas potencialmente perigosas soltos, mentres desde o Concello miran para outro lado”, declarou.

Os populares tamén reprocharon ao Ministerio do Interior a falta de reforzo policial e reclamaron unha actuación coordinada e inmediata para erradicar o punto de venda de drogas, garantir a seguridade cidadá e devolver a tranquilidade aos veciños de Trabanca Badiña.

Finalmente, advertiron de que “ogallá non teñamos que lamentar danos maiores”, insistindo en que a protección da convivencia e da seguridade non pode seguir demorándose.