🔴 𝐗𝐎𝐀́𝐍 𝐂𝐀𝐒𝐓𝐀𝐍̃𝐎 𝐂𝐑𝐈𝐓𝐈𝐂𝐀 𝐀 𝐀𝐋𝐁𝐄𝐑𝐓𝐎 𝐆𝐀𝐑𝐂𝐈́𝐀 𝐏𝐎𝐑 𝐐𝐔𝐄 𝐎𝐁𝐒𝐓𝐀𝐂𝐔𝐋𝐈𝐙𝐀 𝐏𝐑𝐎𝐗𝐄𝐂𝐓OS 𝐄𝐒𝐓𝐑𝐀𝐓𝐄́𝐗𝐈𝐂𝐎𝐒 𝐄 𝐃𝐄 𝐌𝐄𝐋𝐋𝐎𝐑𝐀 𝐃𝐎 𝐂𝐎𝐍𝐂𝐄𝐋𝐋𝐎

 🔴 O Concello de Catoira está pendente de apenas unha última cesión de terreos para que a Deputación de Pontevedra poida executar o proxecto de mellora da estrada provincial Dimo-Coaxe (EP-8703), que contempla a creación de novas beirarrúas e a mellora da seguridade viaria. Así o confirmou este martes o alcalde, 𝐗𝐨𝐚́𝐧 𝐂𝐚𝐬𝐭𝐚𝐧̃𝐨, quen subliñou que se trata dunha actuación prioritaria para a vila viquinga.

🔴 O rexedor nacionalista explicou que o proxecto foi deseñado no ano 2017, pero que non foi ata 2019, coa entrada do BNG no goberno local, cando se iniciaron os primeiros contactos coa veciñanza para avanzar nas cesións necesarias. Ese proceso quedou paralizado posteriormente, xa que —segundo indicou— o goberno de 𝐀𝐥𝐛𝐞𝐫𝐭𝐨 𝐆𝐚𝐫𝐜𝐢́𝐚 non deu ningún paso adiante.

🔴 Co regreso do BNG á Alcaldía no ano 2023, o Concello retomou as negociacións coa veciñanza, celebrando varios encontros no centro social de Dimo e conseguindo as cesións necesarias na marxe esquerda da vía e na maior parte da dereita. Na actualidade só resta unha autorización por pechar.

🔴 Segundo explicou 𝐗𝐨𝐚́𝐧 𝐂𝐚𝐬𝐭𝐚𝐧̃𝐨, a negociación coa única persoa propietaria pendente continúa activa e evoluciona de maneira positiva. “Xa vai habendo mellor disposición e tan pronto teñamos esa última autorización iremos á Deputación a entregar toda a documentación para que se poida iniciar canto antes a licitación das obras”, asegurou.

🔴 O alcalde destacou que a reforma da EP-8703 é unha necesidade urxente para Catoira, xa que son moitas as veciñas e veciños que transitan a pé por este vial sen as condicións axeitadas de seguridade. Neste senso, mostrouse sorprendido de que quen non impulsou actuación algunha cando tivo responsabilidades de goberno reclame agora urxencia na intervención.

🔴 Por outra banda, 𝐗𝐨𝐚́𝐧 𝐂𝐚𝐬𝐭𝐚𝐧̃𝐨 criticou tamén a postura de 𝐀𝐥𝐛𝐞𝐫𝐭𝐨 𝐆𝐚𝐫𝐜𝐢́𝐚 respecto ao proxecto de conexión peonil entre o centro da vila, Pedras Miúdas e o Miradoiro de Abalo, sinalando que a súa petición de paralización supón un novo intento de frear actuacións estratéxicas para o concello.

🔴 O rexedor acusou ao ex alcalde socialista de actuar movido polo “odio e o rancor”, obstaculizando iniciativas modernizadoras que benefician á veciñanza. Advertiu de que poñer trabas á recuperación do Camiño Real non só supón cuestionar un proxecto municipal, senón tamén a iniciativa autonómica ‘Camiños do Litoral’, impulsada pola Xunta de Galicia para potenciar o turismo.

🔴 “A recuperación do Camiño Real é un proxecto estratéxico que cumpre todos os requisitos de singularidade e calidade, o que permitiu obter subvencións tanto europeas como provinciais”, concluíu 𝐗𝐨𝐚́𝐧 𝐂𝐚𝐬𝐭𝐚𝐧̃𝐨, quen defendeu que a tramitación anticipada do proxecto é correcta e permitirá licitar as obras de inmediato cando cheguen os fondos.