🔴 O PP DE CATOIRA DENUNCIA QUE OS ORZAMENTOS 2024 TEÑEN INFORMES DESFAVORABLES DE SECRETARÍA-INTERVENCIÓN

O grupo municipal do PP de Catoira denunciou publicamente que os Orzamentos 2024, aprobados en solitario polo goberno do BNG o pasado mes de xuño, contan con informes desfavorables do Departamento de Secretaría-Intervención. Os populares dubidan da eficacia destas contas para xestionar o Concello e atender axeitadamente aos veciños, malia que os nacionalistas seguiron adiante coa súa aprobación.

Os concelleiros Estefanía Frieiro e Gustavo Comparada lamentaron o triunfalismo do alcalde, Xoán Castaño, e do executivo nacionalista, que cualificaron o documento económico, que ascende a 3,9 millóns de euros, como “realista e o da remontada”. No entanto, os reproches dos servizos técnicos municipais, expresados nos informes que cuestionan a viabilidade destes Orzamentos, apuntan a que serán “inservibles para os veciños” e non cumprirán como folla de ruta para o futuro de Catoira.

Para o PP local, os Orzamentos non atenden axeitadamente as necesidades dos veciños. Sinalan que o incremento irreal da súa contía provén principalmente dos efectos da inflación e da recadación fiscal estatal, así como dunha suba xeneralizada dos impostos e taxas municipais impulsada polo alcalde.

Os populares critican que este incremento de tributos non parece destinado a mellorar servizos, infraestruturas ou equipamentos municipais, senón a inflar as contas e soster o soldo anual de 44.464 euros do alcalde, ao que se suma aproximadamente un 35% máis de cotizacións. Esta situación resulta especialmente grave dada a débeda que padece o Concello.

“Dubidamos moito que o incremento dos tributos se fixera para mellorar os servizos que tanto precisan os veciños. Parece máis ben un intento de xustificar o asalto ao peto dos catoirenses por parte do BNG”, concluíron.