🔴
O alcalde Xoán Castaño e o concelleiro de Cultura Raúl Gómez destacan que o porteiro é unha figura de proxección internacional “que sempre fixo bandeira da súa terra”.
Serxio Álvarez, o ex porteiro do Celta CF coñecido como o ‘Gato de Catoira’, será o pregoeiro da LXIV edición da Romaría Vikinga. Así o anunciou hoxe o goberno local, que da man do alcalde Xoán Castaño e o concelleiro de Cultura Raúl Gómez, argumentaron a elección asegurando que o futbolista é unha figura de proxección internacional que “sempre fixo bandeira da súa terra”.
Os dous dirixentes nacionalistas explicaron que a decisión sobre o pregón foi relativamente sinxela, xa que Álvarez xa fora recoñecido polo Concello como fillo predilecto, polo que hai un consenso xeral sobre a súa figura: “Leva Catoira con el alá onde vai e pona nun plano destacado, facendo que sexa protagonista”, apuntan.
A proposta para ser pregoeiro foi trasladada ao ‘Gato de Catoira’ hai unhas semanas e deu unha resposta positiva dende o primeiro momento. “A primeira reacción foi de perplexidade, quedou moi sorprendido, pero a nosa petición foi moi ben acollida”, subliñou o concelleiro Raúl Gómez.
O propio Serxio Álvarez recoñece que o ofrecemento para ser o pregoeiro da Romaría Vikinga supuxo un grande impacto. “Pregunteille ao alcalde se estaba tolo, se estaba seguro”, bromea o ex futbolista, quen destaca que para el será un grande orgullo e unha gran responsabilidade participar con tanto protagonismo “nunha festa que ten unha historia tan longa”.
“Faime unha ilusión moi grande, e só pensalo pónseme a pel de galiña”, destaca, admitindo que aínda non ten pechado o seu discurso, ao que todas as noites lle dá voltas e lle dedica uns minutos antes de durmir: “Quero facer partícipes a todos e todas do pregón, facelo o mellor posible, ao nivel que merece Catoira, que é moi alto”, sinala.
Álvarez recoñece que a súa vinculación con Catoira é moi grande, xa que foi o lugar no que se criou dende pequeno e que leva no corazón a pesares de estar afastado nos anos nos que estivo activo no fútbol. “Realmente sempre fixen bandeira”, subliña, lembrando que sempre se sentiu orgulloso de compartir a súa orixe en todos os lugares onde foi.
Destaca incluso que cando foi a competicións europeas, nas noticias internacionais, sempre facía referencia á súa orixe de Catoira. “Ver que se nomeaba Catoira nas noticias en inglés ao falar de min era unha alegría”, destaca, para sinalar tamén que ao principio da súa carreira, cando competía no Arousa, incluso tivo algunha discusión con xente da prensa que dicía que era de Vilagarcía en lugar do seu municipio real de orixe.
Sobre a Romaría Vikinga, Álvarez sostén que sempre participou cando non tivo obrigas deportivas, asistindo ás obras de teatro e particularmente aos desembarcos dos domingos pola mañá. Destaca que agora que ten un fillo “que me cambiou a vida ao ser pai”, sempre trata de levalo a Catoira dende Vigo, onde está a súa residencia. “O ano pasado foi a primeira vez que nós e os peques nos caracterizamos. Para min ten un grande significado participar sempre na Romaría”, explicou.
