A piscina municipal situada en Baltar permanecerá pechada do 1 ao 15 de setembro para levar a cabo unha posta a punto das instalacións co obxectivo de ofrecer o servizo nas mellores condicións posibles. Entre as melloras previstas, cambiarase a iluminación a LED, que, xunto coa posta en marcha da planta solar térmica, permitirá que o edificio sexa máis sostible enerxeticamente.
Tamén se realizará a limpeza das xuntas, o revestimento e o rexuntado da piscina pequena con resina. Ademais, substituiranse as placas do falso teito, taparanse gretas, revisaranse os selados, e revestirase o frontal das vigas da cuberta con cobre pregado para mellorar o illamento. Os filtros da deshumectadora tamén serán substituídos. Instalaranse válvulas mesturadoras termostáticas nos vestiarios e cambiaranse as abrazadeiras e fixacións deterioradas.
A maiores, levaranse a cabo labores de limpeza e desinfección dos vasos e de toda a instalación en xeral, así como a posta a punto dos valores de pH e cloro para o seu funcionamento normal.
O Concello de Sanxenxo mantén o horario habitual tanto na piscina como no ximnasio durante os meses de xullo e agosto: de luns a venres, de 7:45 a 14:00 horas e de 17:00 a 23:00 horas; os sábados, de 9:30 a 14:30 horas; e os domingos, de 11:00 a 14:00 horas.
Cabe lembrar que recentemente se automatizou a cloración e o funcionamento do sistema para que a calidade da auga e a temperatura poidan ser controladas a través dunha aplicación.
