🔴 A ESCOLA DE HOSTALARÍA DO SALNÉS ARRINCA UNHA NOVA EDICIÓN DAS XORNADAS DE ALMORZOS SAUDABLES, CON PROTAGONISMO PARA O MEXILLÓN DE GALICIA

 

A ESCOLA DE HOSTALARÍA DO SALNÉS ARRINCA UNHA NOVA EDICIÓN DAS XORNADAS DE ALMORZOS SAUDABLES, CON PROTAGONISMO PARA O MEXILLÓN DE GALICIA

A Escola de Hostalaría do Salnés, xestionada pola Mancomunidade do Salnés en Sanxenxo, deu hoxe o pistoletazo de saída á décimo sexta edición das súas Xornadas de Almorzos Saudables, unha iniciativa consolidada que busca fomentar bos hábitos alimenticios entre o alumnado de centros educativos da comarca.

A xornada inaugural contou coa participación de 40 estudantes de 6º de Primaria do CPI Julia Becerra Malvar de Ribadumia, que gozaron dunha completa experiencia formativa e lúdica. A actividade incluíu unha charla didáctica sobre nutrición, a degustación dun almorzo equilibrado e obradoiros prácticos nas especialidades de Cociña e Sala.

Como novidade desta edición, a campaña conta coa colaboración do Consello Regulador da DOP Mexillón de Galicia, cuxo produto se converteu no ingrediente estrela dalgunhas das receitas elaboradas polo alumnado. A incorporación do mexillón, recoñecido pola súa calidade certificada e valor nutricional, reforza a mensaxe de que comer saudable tamén pode ser saboroso e baseado en produtos locais.

Aproveitando a xornada, tivo lugar tamén a firma oficial do convenio de colaboración entre a Mancomunidade e o Consello Regulador. No acto participaron o presidente e xerente da Mancomunidade, David Castro Mougán e Ramón García Guinarte, así como o secretario e responsable de comunicación e márketing de Mexillón de Galicia, Joaquín Garrido Pardo e Gabriela André.

A actividade permitiu, ademais, achegar o alumnado aos oficios da hostalería. Na especialidade de Sala, practicaron técnicas como o pinzado, servizo en bandexa, coctelería sen alcol e tallado de froitas. En Cociña, elaboraron pizzas e empanadillas con mexillón como ingrediente principal.

As xornadas continuarán ao longo da semana con novas visitas escolares: o CEIP Valle Inclán participará mañá martes e o CEIP As Bizocas do Grove, o xoves.

Con iniciativas como esta, a Mancomunidade do Salnés reafirma o seu compromiso coa formación en hábitos saudables dende idades temperás, ao tempo que promove a gastronomía local e a profesionalización no ámbito da hostalería.