🔴 TOURÍS ACUSA A PSOE E BNG DE DAR AS COSTAS AO TECIDO ASOCIATIVO DA PROVINCIA

 

O vicesecretario de Acción Electoral do PP de Pontevedra e deputado provincial de Acción Comunitaria, Javier Tourís, criticou con dureza na xornada de hoxe a postura de PSOE e BNG, tras rexeitar no último pleno da Deputación apoiar o maior investimento da historia destinado ao tecido asociativo da provincia.

A proposta, defendida polo goberno provincial do PP que preside Luis López, contempla unha modificación de crédito que eleva a partida destinada ás asociacións ata os 5 millóns de euros, fronte aos 2,4 millóns do exercicio anterior. A medida saíu adiante unicamente co apoio da maioría absoluta do PP, mentres que o PSOE se abstivo e o BNG votou en contra.

“Trátase dun novo desprezo da esquerda aos colectivos sociais, culturais e veciñais que traballan día a día para mellorar os seus concellos”, asegurou Tourís, quen cualificou a actitude de socialistas e nacionalistas como “vergoñenta e incomprensible”.

O deputado popular considera que este posicionamento é un “ataque frontal” ao tecido asociativo da provincia e un desprezo aos máis de 700 colectivos que se verán beneficiados por estas achegas, redundando no benestar de entre 40.000 e 50.000 pontevedreses.

“Durante o bipartito encabezado por Carmela Silva, tiveron esquecidas e castigadas ás asociacións veciñais e ás comunidades de augas. E agora, lonxe de corrixir esa actitude, seguen dándolles as costas”, engadiu.

Tourís tamén defendeu que este incremento supón un dos grandes fitos do novo goberno provincial, e reafirmou o compromiso do PP co asociacionismo:

“Somos firmes defensores das asociacións e colectivos, e mentres gobernemos na Deputación manteremos e aumentaremos estas achegas na medida do posible”.

As axudas forman parte dos programas Acción Comunitaria, +Aqua e Novaqua, impulsados para reforzar o papel das entidades sociais, mellorar os seus locais e instalacións, e garantir a súa actividade en todo o territorio provincial.